• Dr Originalartikel vom Bruno drmit ihr sehe kennet wo dr Jürgen no manipuliert hot.
• Em Bruno sei Super Wegbschreibung
• No meh Bildle
• En Zeitongsartikel iber Wange wo dr Harrter's Wofgang poschtet hot.
• Alle Äfflestreffe em Iberblick

Es Eile hot sogar ihre Äffle & Pferdle Plakat vom letzschte Dreffe mitghet wo ma do em Hendergrond sieht.

Des ischs Eile ond dr Bruno.

So noch und noch sind denn dia Leitle eitroffe: dr Marco, dr Joachim ond dr Jürgen wo zsamme von Ulm hergfahre send, dr Holger, dr Rainer, dr Wolfgang, dr Gerold isch eitrudlet, und ganz z'letscht, wo mr scho fascht vrzwabbslet sind, dr Günther und dr Rolf. (Honne etzt no oin vrgessa?) Dia zwoi Siacha sind doch tatsächlich glei in dr Friah im Eistobl gwea und hont scho e ordentliches Laufpensum hintr sich ghett.





Alle hont en Leabrkäs gessa, und er isch bei allne

drin bliebe. Scho do waret mr en wirklich luschtiga Haufa beinand. Die wo später komme send hen sogar Zwiebel zom Leberkäs kriegt, weils die vorher no id gebe hot.

Äffles-Rainer mit em Rolf seiner neie Digitalkamera.

Es Eile, Rainer, Jürgen, Holger (verdeckt), Wolfgang, Goda.

Günther mit seiner Kamera, Rolf, Marco (verdeckt), Eile, Bruno, Michael.

Jürgen, Holger (warom guckt der emmer weg?), Wolfgang.

Au en Neier bei de Dreffe: dr Joachim Schmid, der wo en Duesseldorf Prof an der FH isch.

Dr Gerold mit Frau waret genau wie au dr Bruno zom erschte mol beim Treffe. An der Stell sei no a kloine Anekdot erwähnt: Dr Rolf ond dr Gerold kennet sich von frieher. Die hend als Kender bis etwa 1959 in Schduagart zemma em gleicha Haus gwohnt. No hen se sich aus de Auga verlora ond en dr Newsgroup wiedertroffe. A Bildle von dene zwoi Lausbuabe isch au romgange:

No hots Eile a Päckle drherbrocht von dr Oma Lilo:

so viel Briefmarke

Jetzt send do Praline dren gwä (s'Eile hots vorher no net offe ghet)! Die hen mr em Lauf des Tages au weg brocht, weil obwohl se aus Amerika waret send die net schlecht gwä. Intressant war, daß do en Lagepla mit em Deckel integriert war drmit ma sieht welche Pralin wo liegt. Dees isch gschickt, weil do hots au oagnehme Kokospraline ghet ;-)

S'Eile hot em Marco a Gläsle Nutella mitbrocht, aber dees isch a lange Gschicht. Ond dr Rainer hot Äffle&Pferdle-Mauspads drbei ghet:

So gega zwölfe und e baar Woiza schpätr hont mr eis denn auf de Weag gmachet und sind untr Leitung vom Gerold durch d'Schtadt schpaziert. Z'erscht sen mr vorne beim Fidi naus zom

Lindauer Tor, dann oms Eck nom am Bruno seim Lade vorbei

wo ma ons do älle ens Schaufenschter gucke sieht. Dann wieder hende beim Fidi vorbei durch d'Schtadtmauer durch (do hots a Loch) wo auf der andere Seite scheene Blome wachset:

Mir alle hont gmerkt, daß dr Gerold scho ebbes vom Schtädtle woiß, er hot eis viel vrzehlt. 'S hot jo au viel zum Gucka gäbe. Dia viele Brunne, dia schee agmolete Heisr, d' schmiedeiserne Wirtshausschildr, usw.

Bsonders gfalle hot ons der Bronne mit de Saue ond em hoilige Antonius der auf em ehemalige Saumarkt stoht ond die echte Saue quasi ersetze muaß:

Dr Bruno hot no gschwend miasse auf a Hochzeit zom Musik mache, dGoda isch mit em mit. Kaum send die zwoi weg gwä hot dr Gerold emmer wieder gmoint, daß dr Bruno do zu diesem ond jenem no meh verzehle kennt, obwohl ons hot dr Gerold jo meh wie gnuag verzehlt vom Kloschder Sankt Galle von de Kaiser wo hend 10 Mark Steier em Johr von de Wangener kriegt ond deswege selte do nakomme send ond waroms en Wange so wenig Fachwerkheiser gibt. Wange isch nemlich a "putzte Stadt" des hoisst daß d'Heiser verputzt ond agmolt send. Sogar d'Gschicht von Jonas mit em Walfisch ka ma auf oim Haus bewundre. Wange isch oine von de wenige ehemalige freie Reichsstädt wo katholisch isch.

Dees isch en andrer bekannter Brunne: de verdruckte Allgaier

Wenn ma siebe Allgaier ibranand staplet isch der onderschte so verdruckt wie dr oberschte! Der mit der Maske en der Hand sieht id blos em Wangener OB verdammt ehnlich sondern spuckt au en oregelmäßige Abstend mit Wasser.

So umma halber drui isch mr denn im Narreschtieble, em Vereinsheim vo eiserer Narrezumft, eigloffe. Die hoißet Kuhschelle weiß-rot em Gegesatz zu de Wangener Stadtfarbe wo rot-weiß send. Mei Gisela hot drweilsch scho, mit Hilfe von ere Freindin aus dr Zumft, d'Tisch hergrichtet und en Kaffeee gmachet, und denn hommr zerscht emol ordentlich Kuacha vrbutzt. Es hot en Käskuache, e Schwarzwälder Kirschdorte,

und en Zwetschgakuache geabe. Nochdem nemme gar so arg viel iebrig blieba isch, hot's wohl gschmeckt.

No hen mr no a Gedenksekündle eiglegt fir älle wo net hend drbei sei kenne vor allem die Auslandswangener dr Karle Sigerist ond dr nördliche Manne. Apropos nördliche Manne: Der hot doch beim Eile sein schicke Schirm von dr limited edition liege lau. Den hots Eile mitbrocht ond mit Name kennzoichnet en Wange glau.

Außerdem hots Eile die scheene Orchidee bsorgt wo mr mitsamt em Iberdopf dr Gisela gschenkt hen.

Um viere isch em Eile ihra Ulli aka Framstag mit seiner Freindin Beate denn

tatsächlich no komme. Des ischt au so en Kerle. Ruaft a, er dät beim oina Schtadtdor danneschtande, und i erklär em, wia ner am oifachschte auf de Parkplatz komme dät, und dett dät en dr Rudi und i abhole. Mir zwoi Bachel schtandet do und wartet, und der Kerle fahrt drweil vo hinte auf de Parkplatz und hot uns oifach schtande losse, weil er von dr Ferne scho de Äfflesrainer gsä hot ...

Abr denn simmr in d'Häskammer von dr Wangemer Narrezumft gange, und dett hont meine Freind scho dia Wangemer Fasnetsmaske aufbaut. Dr Reinhold hot erklärt, was an dene Häser so danne sich, was es mit den Maske so auf sich hot.





Imme andere Zimmr hont mir, meine Narrefreind und i, denn eisere Häser azoge, und eiser Narrevatter hot denn e jeds oinzeles vorgschtellt und erklärt.

Lenks dr Büttel und Narrevatter Uli, der hot älles erklärt. No kommt en Flachsnarr, a Aneweible mit Flachsblüte ond Strohhut, ond en Spindelnarr der wo Baumwollspindele an seim Häs hot. Es wisset also etzt auf jeden Fall alle, daß d'Narre Schelle traget und koine Glocke :-)

Dr Rainer, Rolfeisen, Wolfgang, Holger

Goda, Eile, Marco ond Gisela (em Bruno sei Frau wo au kocht hot) hend älle ganz aufmerksam zugloset.

Der Narresame war au mit drbei.

Anschließend, 's war inzwische scho um de sechse rum, hommr eis e bizzele d'Fiaß vrtretta, und sind drnoch wiedr ins Narreschtieble zum Essa. A Gruppephoto hot au no sei misse.

D' Gisela hot fier jeden en Krautkrapfe vorbereitet ghett, daß mr des au emol probiert hot. Es isch schließlich e Original-Allgaier Essa. Drnoch hot se (zeitaweis mit kräftiger Unterschtützung vom Jürgen, dank Dr schee) Kässpätzle ghoblet - Knöpfla, wias bei eis dr Brauch isch, mit Schtink- und Emmetalerkäs hot ses gmacht. Vrschiedene Salat drzue, und wenn do oinr amend hungrig blieba wär, denn wär r grad sell schuldig gwea. Abr vrmutlich hont alle gnuag ghett. E ganze Roih vo meine Narrefreind sind au no dobliebe und hont drzuegholfe.

Und so simmr halt im Narreschtieble hocke bliebe und hont gratschet und gschwätzt. 'S hot gnuag zum trinke gäbe, bloß dr dunkle Woiza ischt ausgange. Abr me hot sich behelfa kenne mit em helle Woiza :-) D Goda hot em Jürgen no ihre Israelbilder zoigt:

'S Eile hot eis denn no 's Liad vom Allewis vorgsunga, des mr z'Gmind allat vom Kirchaturm rabbloset. Schee. Und singa ka se fai! Mit däre miasset mr emol de Äfflesblues eischtudiera. Und dr Jürgen, dr Rainer und dr Holger miasset drzue danze!

So isch dr Dag ruck-zuck vrbeigange, und so langsam hont sich dia Roiha glichtet, 's hot jo so mancher weit hoimfahre miasse. Bloß 's Eile, d'Goda, dr Rudi und dr Michael sind dobliebe, mit dene hommr noch no zwoi Fläschla Wei gleert. So ummer halber zwoi bin i denn im Bett gwäse.

So isch es also gwäse. Am Sonntisch hont die "Iebernachter" no en kloine Schpaziergang gmachet und mi drhoim no bsuacht, und ummer zwölfe sind se denn au hoimwärts gfahre.

'S war schad, daß it alle komme hont kenne, abr i bi mr sicher, es näkschte Äfflestreffe kommt. I dank Eich allne nomol fier Eier Komme, fier dia guat Laune, wo Ihr mitbrocht hont, fier dia schee Blum, wo mei Gisela kriagt hot, und daß i Eich alle emol kennelerne hon dirfa. Es isch schee, daß mr sage ka: 'S Internet und dr Compjutr duant it einsam mache - 's ka richtig vrbinda. Oifach schee.