From narren@w-4.de Mon Sep 20 13:06:53 1999 From: =?iso-8859-1?Q?Bruno_Sch=F6llhorn?= Newsgroups: alt.aeffle.und.pferdle Subject: =?iso-8859-1?Q?Re:_=C4fflesdreffa...?= Date: Mon, 20 Sep 1999 11:31:01 +0200 Organization: T-Online Lines: 96 Message-ID: <7s4ur1$ll1$1@news07.btx.dtag.de> References: Reply-To: =?iso-8859-1?Q?Bruno_Sch=F6llhorn?= Mime-Version: 1.0 Content-Type: text/plain; charset="iso-8859-1" Content-Transfer-Encoding: 7bit X-Trace: news07.btx.dtag.de 937819809 22177 075223300-0001 990920 09:30:09 X-Complaints-To: abuse@t-online.de X-Sender: 075223300-0001@t-dialin.net X-Priority: 3 X-MSMail-Priority: Normal X-Newsreader: Microsoft Outlook Express 5.00.2014.211 X-MimeOLE: Produced By Microsoft MimeOLE V5.00.2014.211 Path: news.uni-ulm.de!rz.uni-karlsruhe.de!fu-berlin.de!newsfeed01.btx.dtag.de!newsmm00.btx.dtag.de!news.btx.dtag.de!not-for-mail Xref: news.uni-ulm.de alt.aeffle.und.pferdle:19849 So, e baar hont jo scho gschriebe, dass se guat hoimkomme sind. I hoff, dass des alle eso gange isch. Dr Wolfgang hot mi vrdonneret, i soll en Bericht iebr des Treffe sell schreibe fier dia, wo it komme hont kenna. I gib etzt halt emol en kurze Ablauf vo dem Dag. Am Vormittag hon i no e bizzele en Schtress ghett, und i hon mi ganz arg beeilt, dass i um halber zehne wirklich im Fidelesbeck waer, abr wia i, vrschwitzt vor lautr Hudla, zwoi Minute noch halbr in mein Lada neigwetzt bin, denn isch do tatsaechtlich scho 's Eile und ihra Rudi, dr Michael, den se aus Tanna gholet hont, und sogar d'Goda, dia ekschtra scho umma faife weggfahre ischt, dogschtande. Hei, war des e Iebrraschung und a Freid. Mir sind denn glei in de Garte vom Fidelesbeck ghocket, der isch jo fascht mei Nochbr, und hont zerscht emol e Bier bschtellt. So noch und noch sind denn dia Leitle eitroffe: dr Holger, dr Marco, dr Joachim, dr Rainer, dr Wolfgang, dr Gerold isch eitrudlet, dr Juergen, und ganz z'letscht, wo mr scho fascht vrzwabbslet sind, dr Guenther und dr Rolf. (Honne etzt no oin vrgessa?) Dia zwoi Siacha sind doch tatsaechlich glei in dr Friah im Eistobl gwea und hont scho e ordentliches Laufpensum hintr sich ghett. Alle hont en Leabrkaes gessa, und er isch bei allne drin bliebe. Scho do waret mr en wirklich luschtiga Haufa beinand. So gega zwoelfe und e baar Woiza schpaetr hont mr eis denn auf de Weag gmachet und sind untr Leitung vom Gerold durch d'Schtadt schpaziert. Mir alle hont gmerkt, dass der Kerle scho ebbes vom Schtadtle woiss, er hot eis viel vrzehlt. 'S hot jo au viel zum Gucka gaebe. Dia viele Brunne, dia schee agmolete Heisr, d' schmiedeiserne Wirtshausschildr, usw. So umma halber drui isch mr denn im Narreschtieble, em Vereinsheim vo eiserer Narrezumft, eigloffe. Mei Gisela hot drweilsch scho, mit Hilfe von ere Freindin aus dr Zumft, d'Tisch hergrichtet und en Kaffeee gmachet, und denn hommr zerscht emol ordentlich Kuacha vrbutzt. Es hot en Kaeskuache, e Schwarzwaelder Kirschdorte, und en Zwetschgakuache geabe. Nochdem nemme gar so arg viel iebrig blieba isch, hot's wohl gschmeckt. Um viere isch em Eile ihra Ulli mit seiner Freindin denn tatsaechlich no komme. Des ischt au so en Kerle. Ruaft a, e daet beim oina Schtadtdor danneschtande, und i erklaer em, wia ner am oifachschte auf de Parkplatz komme daet, und dett daet en i und dr Rudi abhole. Mir zwoi Bachel schtandet do und wartet, und der Kerle fahrt drweil vo hinte auf de Parkplatz gfahre und hot uns oifach schtande losse..... Abr denn simmr glei in d'Haeskammer von dr Wangemer Narrezumft gange, und dett hont meine Freind scho dia Wangemer Fasnetsmaske aufbaut. Dr Reinhold hot erklaert, was an dene Haeser so danne sich, was es mit den Maske so auf sich hot. Imme andere Zimmr hont mir, meine Narrefreind und i, denn eisere Haeser azoge, und eiser Narrevatter hot denn e jeds oinzeles vorgschtellt und erklaert. Es wisset also etzt auf jeden Fall alle, dass mir Schelle traget und koine Glocke :-) Anschliessend, 's war inzwische scho um de sechse rum, hommr eis e bizzele d'Fiass vrtretta, und sind drnoch wiedr ins Narreschtieble zum Essa. D' Gisela hot fier jeden en Krautkrapfe vorbereitet ghett, dass mr des au emol probiert hot. Es isch schliesslich e Original-Allgaier Essa. Drnoch hot se (zeitaweiss mit kraeftiger Unterschtuetzung vom Juergen, dank Dr schee) Kaesspaetzle ghoblet - Knoepfla, wias bei eis dr Brauch isch, mit Schinkt- und Emmetalerkaes hot ses gmacht. Vrschiedene Salat drzue, und wenn do oinr amend hungrig blieba waer, denn waer r grad sell schuldig gwea. Abr vrmutlich hont alle gnuag ghett. E ganze Roih vo meine Narrefreind sind au no dobliebe und hont drzuegholfe. Und so simmr halt im Narreschtieble hocke bliebe und hont gratschet und gschaetzt. 'S hot gnuag zum trinke gaebe, bloss dr dunkle Woiza ischt ausgange. Abr me hot sich behelfa kenne mit em helle Woiza :-) 'S Eile hot eis denn no 's Liad vom Allewis vorgsunga, des mr z'Gmind allat vom Kirchaturm rabbloset. Schee. Und singa ka se fai! Mit daere miasset mr emol de Aefflesblues eischtudiera. Und dr Juergen, dr Rainer und dr Holger miasset drzue danze! So isch dr Dag ruck-zuck vrbeigange, und so langsam hont sich dia Roiha glichtet, 's hot jo so mancher weit hoimfahre miasse. Bloss 's Eile, d'Goda, dr Rudi und dr Michael sind dobliebe, mit dene hommr noch no zwoi Flaeschla Wei gleert. So ummer halber zwoi bin i denn im Bett gwaese. So isch es also gwaese. Am Sonntisch hont die "Iebernachter" no en kloine Schpaziergang gmachet und mi drhoim no bsuacht, und ummer zwoelfe sind se denn au hoimwaerts gfahre. 'S war schad, dass it alle komme hont kenne, abr i bi mr sicher, es naekschte Aefflestreffe kommt. I dank Eich allne nomol fier Eier Komme, fier dia guat Laune, wo Ihr mitbrocht hont, fier dia schee Blum, wo mei Gisela kriagt hot, und dass i Eich alle emol kennelerne hon dirfa. Es isch schee, dass mr sage ka: 'S Internet und dr Compjutr duant it einsam mache - 's ka richtig vrbinda. Oifach schee. Viele Griass vom Bruno Dr Gerold wird no en Artikel fier d'Zeitung schreiba, und i hoff, dass mr des Gruppabild, wo dr Rudi gmachet hot, bald kriaget, dass mr des drzua tua ka.