From news.belwue.de!news.uni-stuttgart.de!news.fh-hannover.de!newsfeed.nacamar.de!howland.erols.net!infeed.is.co.za!feeder.is.co.za!hawk.pix.za!pmd3-8.vp.pix.za Wed Jun 3 10:34:59 1998 From: manfred.baur@pixie.co.za (Manfred Baur) Newsgroups: alt.aeffle.und.pferdle Subject: Sche war's!!!! Date: Tue, 02 Jun 1998 17:11:13 GMT Message-ID: <35741e3e.3625434@news.pix.za> X-Newsreader: Forte Free Agent 1.11/16.235 NNTP-Posting-Host: pmd3-8.vp.pix.za Lines: 85 Path: news.belwue.de!news.uni-stuttgart.de!news.fh-hannover.de!newsfeed.nacamar.de!howland.erols.net!infeed.is.co.za!feeder.is.co.za!hawk.pix.za!pmd3-8.vp.pix.za Xref: news.belwue.de alt.aeffle.und.pferdle:12169 Also, jedsad be'ne wieder daheim bei meine Affa . Aber sche war's drodsdeam. D' Kuche ischd g'weislad, 's Garaschadoor ischd g'schdricha, d'r Gaarda siehd wieder noch ebbes gleich, d' Behm send g'schnidda, 's Gras ischd (wenigschdens fuer de naehschda vier Wocha ) wieder a bissle kuerzer, d' Heck ischd wieder grad ond beim Gardaduerle guckad d'r Roschd nemme so wiaschd raus. 'S Wetter war guad, d' Mauldascha hond g'schmeckt, Sauerkraud ond Schbaedzle vermiss i au schau wieder, d' Seidawuerschdle en da Lensa warad au Sau-guad usw. Aber eis derf i it vergessa: Des Bier..... Oh wenn e do dra denk, no laufd m'r schau 's Wasser em Maul wieder z'samma. Aber onser Dreffa en Ulm war "ein wahres Erlebnis". Also i haet it denkd, dass d'r Dollinger so an guader Koch ischd. Dia Schbargel warad wiklich ganz super Klasse. 2 1/2 kg hond m'r ons ganz bruederlich deild. No schad, dass d' Zeit so schnell verbei ganga ischd. Entressand war ganz besonders, da Wolfgang Hartter ond da Aeffles Rainer mol kenna z' lernad. Also dia Kerle, dia beim Hartter en'd Schual gangad, hond an wirklich guada ond netta Lehrer, wia mir en onsre Dag beschdemmd koin hend k'het. Ond d'r Aeffles Rainer siehd ganz anserschd aus wia uff sellem Bildle en sei'ra Home-Page. Wenn m'r ons s' naehschd mol wieder dreffa dond, mueassad dia zwei ganz beschdemmd au wieder d'rbei sei. Dass d'r Guenther komma ischd war naduerlich fuer mi a ganz besonders Ereignis. I hau wirklich glaubd, dass d'rsell no en Texas ischd bei seine Indianer ond naduerlich beim Werner. No schad, dass d' Gauda hot Kend hueada miassa. Aber so got's hald wenn ma Muader ischd. 'S goht it emmer so wia's ma's gern haed. Uff aell Faell hau'ne mol da Vorschlag g'machd, vielleichd koennad m'r ons mol so ueber a ganzes langes Wochaend dreffa ond d'rzua so a Huette miada uff d'r Alb doba. So eine vom Albverein. Des waer doch wirklich sche, oder it? Aber do muass i Euch doch no ganz g'schwend des G'schiichdle verzella des mir do z' Schduagerd bassierd ischd. Also i hau vo Balenga da Regionalexpress (des hoerd sich ganz g'schwolla a, weil doch bisher 's schnellschd Zuegle war hald d'r Eilzug) noch Schduagerd g'nomma. So en d'r Hoehe vo Moessenga hond se a da Gleis rombaeschdlad. Dodurch send mir zeah Minuta z' schbot en Schduagerd a'komma. Derd hond se exdra da Intercity noch Berlin fuer ons a'kalda. Mo ne no derd vo Gleis neun zom Gleis zwoelf mit meim Gepaeck-Kerrele g'schoba be ischd do so an Balle mit ra rauta Kappa neaba m'r hergloffa ond hot me a'gschia, i sod doch en da erschda Waga nei, se wellad glei abfahra. Aber i gib doch koine drei Maerker aus om an Bladz z' reserviera ond no muass i schdau. No hau'nen hald ganz bloed a'guckd, mit am Ergebnis, d'r Kerle ischd no no wiadiger worra. Bloedzlich warad do hald a baar Leud vor mir ond do hau'ne ausweicha miassa, mit am Ergebnis, der mit seim rauda Kaepple ischd ueber mei Waegele g'floga. A'ghalda haune it. Er hot hender m'r herg'schria:" Haltet den Mann an, er hat mich mit dem Koffer-Kuli ueberfahren. Ich nimm ihn zur Bahnpolizei." I aber, hau degd, Kerle jedzd leckschd me doch schau em A.. Wenn da deine Glodzbebbel it uffmacha kaschd , no muaschd hald en da Dreck nei liega, ond be en mein ICC ei'g'schdiega. Do ischd doch mir grad gegaueber einer g'sessa, der hot drei Haendis g'hed. Er hot se sche en ei'ra rei liega g'hed ond dia hend au regelmaessig a'gfanga z' leudat. Wia sich waehrend d'r Fahrt rausg'schdelld hot, war 's eine fuer'd Frau, 's ander fuer d' Freundin ond 's ledschd fuer's G'schaefd. Ond do sagd ma da Deudscha gings schlechd. Er ischd noch Berlin g'fahra. So, jedsad aber Schluss. Was m'r no bei d'r Alitalia (mit deana be'ne g'floga) bassierd ischd, sell verzell i Euch 's naeschd mol. Eis ka'ne no saga: Fliagat nia mit da Italiener, deselle send no schlemmer wia d' Norddeidsche. Bleibad g'sond, send nett zuanand ond a Weihnachda dreffad m'r ons schbaedeschdens wieder. Herzliche grueass vo onserm schena Siiiiiiiiiiiid Afrika Manne Manfred Baur manfred.baur@pixie.co.za Wear z Balenga dahoam ischt, Der kommt om does it nom: A Loable schilt ma n oafach, Koa Mensch woasst reacht, worom.